حسن بٹ 1125 نمبر لے کر اسکول میں سرفہرست، ابوبکر کی دوسری اور فہد علی کی تیسری پوزیشن
سیالکوٹ (خصوصی رپورٹر): گورنمنٹ ہائی اسکول بن باجوہ، ضلع سیالکوٹ نے میٹرک سالانہ امتحان 2026ء میں شاندار کارکردگی کا مظاہرہ کرتے ہوئے 86.90 فیصد کامیابی حاصل کرلی۔ بہترین نتائج پر طلبہ، والدین اور اساتذہ میں خوشی کی لہر دوڑ گئی، جبکہ کامیاب طلبہ نے اپنی محنت اور اساتذہ کی رہنمائی کو اپنی کامیابی کا بنیادی ذریعہ قرار دیا۔
اسکول کے نتائج کے مطابق حسن بٹ نے 1125 نمبر حاصل کرکے گورنمنٹ ہائی اسکول بن باجوہ میں پہلی پوزیشن حاصل کی۔ ابوبکر نے 1086 نمبر کے ساتھ دوسری جبکہ فہد علی نے 972 نمبر حاصل کرکے تیسری پوزیشن اپنے نام کی۔
دیگر نمایاں کارکردگی کا مظاہرہ کرنے والے طلبہ میں محمد احمد نے 954، آکاش مسیح 942، شارون مسیح 942، عبدالفیضان 942، محمد دانش 937، محمد زین العابدین 916، محمد زہیب مغل 906 اور معاذ احمد شبیر نے 903 نمبر حاصل کیے۔
اس شاندار کامیابی پر اسکول کے پرنسپل شبیر احمد رضا اور وائس پرنسپل ڈاکٹر محمد یونس مغل نے کامیاب طلبہ، ان کے والدین اور تمام اساتذہ کو مبارکباد پیش کرتے ہوئے کہا کہ یہ کامیابی طلبہ کی مسلسل محنت، اساتذہ کی انتھک کاوشوں اور والدین کے تعاون کا نتیجہ ہے۔ انہوں نے امید ظاہر کی کہ کامیاب طلبہ مستقبل میں بھی اپنی تعلیمی کارکردگی کا سلسلہ جاری رکھتے ہوئے ادارے اور اپنے والدین کا نام روشن کریں گے۔
اسکول انتظامیہ اور تدریسی عملے نے تمام کامیاب طلبہ کو دلی مبارکباد پیش کرتے ہوئے ان کے روشن مستقبل، مزید کامیابیوں اور اعلیٰ تعلیم کے لیے نیک خواہشات کا اظہار کیا۔
گورنمنٹ ہائی اسکول بن باجوہ کی یہ کامیابی اس امر کی عکاس ہے کہ محنت، معیاری تدریس، بہترین رہنمائی اور والدین و اساتذہ کے باہمی تعاون سے سرکاری تعلیمی ادارے بھی شاندار تعلیمی نتائج حاصل کرسکتے ہیں۔
